ଯୁଯୁମୁରା ଥାନା ଅନ୍ତର୍ଗତ ବସିଆପଡ଼ା ଗାଁରେ ଦେଶୀ ବନ୍ଧୁକ ଦେଖାଇ ଗ୍ରାମବାସୀଙ୍କୁ ଭୟଭୀତ କରୁଥିବା ଜଣେ ଯୁବକକୁ ପୁଲିସ ଗିରଫ କରିଛି। ଅଭିଯୁକ୍ତ ଜଣକ ହେଲେ ରଜତ ବୁଡ଼େକ।
ମିଳିଥିବା ସୂଚନା ଅନୁସାରେ, ଗତ ବୁଧବାର ସନ୍ଧ୍ୟା ସମୟରେ ଅଭିଯୁକ୍ତ ରଜତ ହାତରେ ଏକ ଦେଶୀ ବନ୍ଧୁକ ଧରି ଗାଁରେ ବୁଲୁଥିଲା। ଏହା ଦେଖି ଗ୍ରାମବାସୀମାନେ ଭୟଭୀତ ହୋଇପଡ଼ିଥିଲେ ଏବଂ ଅଞ୍ଚଳରେ ଆତଙ୍କ ଖେଳିଯାଇଥିଲା। ଏ ନେଇ ଗ୍ରାମର ହେମନ୍ତ ମାଝୀ ଯୁଯୁମୁରା ଥାନାରେ ଏକ ଲିଖିତ ଅଭିଯୋଗ କରିଥିଲେ।
ଅଭିଯୋଗକୁ ଭିତ୍ତି କରି ଯୁଯୁମୁରା ପୁଲିସ ତୁରନ୍ତ ତଦନ୍ତ ଆରମ୍ଭ କରିଥିଲା। ପୁଲିସ ଅଭିଯୁକ୍ତ ରଜତକୁ କାବୁ କରିବା ସହ ତା' ପାଖରୁ ସେହି ଦେଶୀ ବନ୍ଧୁକଟିକୁ ଜବତ କରିଛି। ଆଜି ପୁଲିସ ପକ୍ଷରୁ ଅଭିଯୁକ୍ତକୁ କୋର୍ଟଚାଲାଣ କରାଯାଇଥିବା ସୂଚନା ମିଳିଛି।
